अजूनही आठवतंय
दोन वेड्यांना भटकंतीच वेड असणं,
त्या वेडातून दोघांचं मनसोक्त फिरणं.

अजूनही आठवतंय
सतत सहवासाने एकमेकांना जाणून घेणं,
त्यातून हळूहळू आपली मैत्री फुलत जाणं.

अजूनही आठवतंय
रात्र रात्र उगाच गप्पात जागत राहणं,
सगळं काही विसरून ते लाडीवाळ बोलणं.

अजूनही आठवतंय
छोट्या छोट्या गोष्टींवरून अबोला धरणं,
मैत्रीचे किस्से सांगून हळूच रुसवा काढणं.

अजूनही आठवतंय.
सोबत फिरायला जाण्याची आतुरतेने वाट पाहणं,
तो भेटण्याचा दिवस उजाडला की आनंदून जाणं.

अजूनही आठवतंय.
गाडीवर बसताना प्रेमाचा नकळत स्पर्श होणं,
आणि त्या नाजुक स्पर्शाने मनोमन मोहरुन जाणं.

अजूनही आठवतंय
गाडीच्या अरशातून एकमेकांना चोरून पाहणं,
आपल्या मैत्रीच हळूवार प्रेमात रूपांतर होणं.

अजूनही आठवतंय
जीवनसाथी म्हणून तुझं आयुष्यात येणं,
आणि माझं आयुष्य आनंदाने फुलून जाणं.
– प्रेमा