मैत्रीच्या ना ना तऱ्हा

काही मित्र असतात नेहमीच गोड बोलणारे;

पण नेमकं तुमच्या अडचणीला लांब पळणारे.

काही मित्र असतात कामापुरते नेमक्या शब्दात बोलणारे;

पण कोणत्याही अडचणीला पटकन धावून येणारे.

काही मित्र असतात पार्ट्या करत फिरणारे;

पण तुमची वेळ आली की पळ काढणारे.

काही मित्र असतात टवाळक्या करत फिरणारे;

पण मैत्रीच्या प्रेमळ भावना मनोमन जपणारे.

काही मित्र असतात कमी वेळ देणारे;

पण मैत्रीसाठी निस्वार्थी भाव जपणारे.

काही मित्र असतात नको त्या चुका लपवणारे;

पण वेळ आली की तुम्हालाच तोंडावर पडणारे.

काही मित्र असतात चुकीवर खडे बोल सूनवणारे; पण तुमच्या संकटकाली जीवाला जीव देणारे.

काही मित्र असतात पाया पडून मदत मागणारे;

पण वेळ आली की तुम्हालाच चुना लावणारे.

काही मित्र असतात खडूस नावाने बदनाम होणारे; पण तुमच्या पडत्या काळात नेहमी धीर देणारे.

मैत्रीच्या कोणत्या तऱ्हेत बसायचं हे आपणच ठरवणारे,

मैत्रीचा प्रकार पण शेवटी आपणच निवडणारे.

काही मित्र असतात वेळीच डोळे उघडणारे,

तुम्हाला जीवनातील योग्य मार्ग दाखवणारे.

– प्रेमा